友善的毒舌生活－－香港飲食篇＃1

大家好！
有一段時間沒有更新網誌了，
小小分享一下友善的毒舌生活。（笑）
這篇主力講講由各路英雄開啟的隱藏menu⋯⋯


一日三餐，人生少不免飲飲食食，少少分享一下噴血點比較高嘅事件，都激活唔少腦創意㗎！
為咗保障大家，店名稍稍隱藏一下，歡迎對號入座。

1. 隱藏飲品
相信X仔XX米線，大家都食得多。
基本上一見到招牌黃黃綠綠，已經知道係X仔。
早前就有朋友分享，無論去到邊一間分店，都有招牌隱藏飲品！

友：「唔該一杯凍檸茶。」
無論邊間分店，啲姐姐永遠都好似夾定咁，會開啟隱藏menu好霸氣咁為佢落單！
就係「招牌隱藏飲品」：「凍撚茶！」⋯⋯

唔知聽日朋友想飲凍撚、熱撚定係無撚茶呢？（大誤）

2.隱藏調味料
有次帶媽咪去飲茶，媽咪嗌咗個山竹牛肉但係無喼汁，於是搵個姐姐問問⋯⋯
「唔該，可唔可以比個喼汁我哋呀？」
姐姐轉身拎一拎，好霸氣咁用力將成支喼汁「投擲」落我哋張枱。

（唔係講笑，真係好似攻城武器咁「隊」落張枱度！好似要爆城門咁！）

姐姐：「gap汁呀！」
（吓⋯⋯唔係咁堅下嘛！）
我：「唔該晒你呀⋯⋯」（無力）

腦交戰：咁究竟食原味好呢？定食阿姐啲「gap汁牛肉」好呢？

3.隱藏號碼
N年前晚市同同學去食大X樂，買咗飛等餐，因為好肚餓，一直好留心聽住幾時到我呢？
姐姐開咪：
「河馬307，河馬308⋯⋯」
「河馬309，河馬309⋯⋯」
終於到我！309！
姐姐：「河馬309拎得！」
我：（其實我係號碼309嘅⋯⋯河馬嚟？）

你有無見過河馬食鐵板餐吖？至少河馬309有食過⋯⋯（淚崩）